Kuomba Mkopo

MASHARTI YA KUOMBA MKOPO KATIKA BODI YA MIKOPO YA SERIKALI ZA MITAA

Bodi hii ni chombo kilichoanzishwa kwa mujibu wa Sheria ya Fedha za Serikali za Mitaa ya Mwaka 1982 Sura Na.290. Re. 2002. Lengo kuu la kuanzishwa kwa Bodi ni kutoa fedha kwa njia ya mikopo ili kutekeleza miradi inayolenga kuchochea shughuli za kiuchumi, kuongeza ajira na mapato ya Halmashauri husika.

Kimsingi, Halmashauri inayo fursa ya kukopa katika Bodi ili mradi iwe imetimiza masharti yafuatayo:-

1. Imekamilisha Mchango wake wa Akiba (Minimum Compulsory Reserve) kwa asilimia 100. 
2. Halmashauri inatakiwa iandae andiko la mradi (Project Write-up) na kuwasilisha kwenye Bodi.
3. Mradi husika uwe umepata baraka za Kikao cha Baraza la Madiwani wa Halmashauri husika.
4. Mradi uwe mmoja mahsusi, unaotekelezeka na wenye manufaa kiuchumi na kijamii kwa Halmashauri. Aidha Halmashauri inayo fursa ya kukopa tena baada ya kukamilisha mradi uliopata mkopo awali na kurejeshwa.
5. Halmashauri inatakiwa kuainisha kazi zitakazotekelezwa kwenye mpango kazi utakaoandaliwa kwa kipindi chote cha mradi.
6. Halmashauri inatakiwa ichangie asilimia 20 ya gharama ya mradi husika. Kwa maana hiyo kiasi cha asilimia 80 ya gharama za mradi ndicho kitakachotolewa na Bodi kwa njia ya mkopo.
7. Mkopo utarejeshwa katika kipindi cha muda maalum kulingana na ukubwa wa mradi kwa riba ya asilimia kumi na tatu (13%) kwa mwaka kwa sasa.
8. Marejesho ya mkopo yatatokana na vyanzo vya mapato ya Halmashauri kwa ujumla pamoja na mapato ya mradi husika utakapoanza kufanya kazi.
9. Marejesho ambayo muda wake utakuwa umepita, riba (penalty) ya asilimia moja (1%) itatozwa.
10. Halmashauri itatakiwa kuwasilisha taarifa iliyothibitishwa na Baraza la Usimamizi wa Mazingira (NEMC) au taasisi inayotambulika iliyoidhinishwa na Baraza la Usimamizi wa Mazingira kuonyesha jinsi suala la mazingira litakavyosimamiwa ili kuhifadhi mazingira.
11. Masharti mengine ya mkopo huelezwa kwenye mkataba wa mkopo ambao huandaliwa kwa ajili ya kusainiwa na Halmashauri na Menejimenti ya Bodi kwa mujibu wa makubaliano.